Read Story: SEASON 1 EPISODE 17
E get one man wey dey inside bus wey I enter this morning, na iPhone wey the man get. I don notice say the guy wey siddan near him don dey eye Mr iPhone phone somehow somehow. My mind don tell me say this one fit be pickpocket wey enter bus o . I be want tell that man to be very careful but I lockup base on say for this Lagos, e get as you go talk you go collect . So as I dey for back, listening to music with my earpiece, I just dey monitor Broda pickpocket movements , e no pure at all.
The guy wey siddan by the left of Mr iPhone don notice the movement of Broda pickpocket too but same as me, him lockup.
Is like Broda pickpocket jazz Mr iPhone, baba start to sleep and pickpocket stylishly collect the phone but me and the other guy don capture him like CCTV wey dey inside super market but we still lockup.
We don reach final bus stop , everybody don dey come down . Broda pickpocket don Come down and him be want rush go , na so the other guy wey seeyam when him collect the phone hollam for cloth. Him dey shout why the guy hollam , say make him leave him before he will change am for him . The guy say him no fit do anything. Mr iPhone come down and start to find his phone , baba don dey shout and cry . Me sef I come down ,na him the guy wey hold Broda pickpocket for cloth tell Mr iPhone say na pickpocket thief his phone . Guy man be want argue and deny, na him another woman confam say na him collect am , say she seeyam but she dey fear to talk , me sef come confam say na him take am .
Ahh, conductor givam double slap , him start to pull off his clothes, pickpocket don put iPhone inside his boxers o 🙆🙆🙆. People get mind shaa. Why doing all this kind things sef ? Me I kuku Waka quick comot from that place coz I no get strength for all those kind wahala.