Danfo wahala - S01 E16

Story 2 years ago

Danfo wahala - S01 E16

Read Story: SEASON 1 EPISODE 16

Well, very soon shaa i go buy my own car . I been don save #500 already but hungry wey wire me , I remove #200 from the #500 go chop ewa agoyin and bread , after all na person wey dey alive go save money.

So I enter this bus wey e get one guy wey dey answer phone call . Lie wey that guy lie during his phone call even devil go shout blood of chisossssssss. Person wey dey inside bus but him dey tell the person wey call him say he is in alaba international market to buy some goods . How inside bus take turn to alaba market? Anyways the thing shock one woman wey siddan near him and she tellam to dey lie small small .

Guy man just lock down and he made another call in which him tell the person say he is ontop of okada now and that he will reach in 2 minutes.

Conductor shock , and tellam say him no fit make heaven with these kind lies . Guy man tell conductor say na him be gateman for heaven.

E reach one point wey driver tellam say if him lie again, him go come down from his bus .

This guy just dey throw lamba inside bus but he was funny shaa.

Anyways, me I just siddan for back dey listen to music , nodding my head like agama lizard wey fall from tree top while laffing at his lies.